თამაზ ბაკურიძე ისევ არ შეიწყალეს

{ემზარ დიასამიძე/ბათუმელები}
გუშინ შეწყალების კომისიამ მორიგი სხდომა გამართა. კომისიის წევრთა თქმით, შესული განცხადებების დიდი ნაწილი დააკმაყოფილეს. პრეზიდენტს ხელმოსაწერად 120-მდე პატიმრის სია გადაეცა. შეწყალებულებს, სავარაუდოდ, 23 ნოემბერს გაათავისუფლებენ.
შეწყალება არ შეეხებათ მძიმე და სამოხელეო დანაშაულისა და ქრთამის აღების ფაქტებზე გასამართლებულებს. შეწყალების კომისიის წევრის, გაზეთ ”24 საათის” მთავარი რედაქტორის, მამუკა ფაჩუაშვილის განცხადებით, შეწყალებულთა სიაში მსუბუქი და ნაკლებადმძიმე მსჯავრდებულები მოხვდნენ, მათ შორის, არ არიან პოლიტპატიმრები: ”პოლიტპატიმრები, ვისითაც ოპოზიცია აპელირებს, კომისიაზე წარმოდგენილი არ იყვნენ. რატომ, არ ვიცი”.

ფაჩუაშვილის თქმით, შესაწყალებელთა სიაში არც ჟურნალისტი თამაზ ბაკურიძეა.
კომისიის წევრია მწერალი ლაშა ბუღაძეც. იგი კომისიის გუშინდელი სხდომით კმაყოფილია: ”შემოსული განცხადებების უმრავლესობა დავაკმაყოფილეთ. თუმცა, ეს იმას არ ნიშნავს, რომ პრეზიდენტი ჩვენ მიერ წარდგენილ ყველა პატიმარს შეიწყალებს. ამის მაგალითად შალვა რამიშვილი გამოდგება, რომელიც ჩვენმა კომისიამ შესაწყალებელთა სიაში ერთხელ უკვე შეიყვანა, მაგრამ ის არ შეიწყალეს. ახლა, რამდენადაც ვიცი, თავად მასაც არ სურს შეწყალება. მოკლედ, ძალიან ბევრ პატიმარს, ვინც შეწყალების სიაშია და გათავისუფლებას ელის, შეიძლება იმედი გაუცრუვდეს”.

რაც შეეხება პოლიტპატიმრების თემას, კომისიის წევრი, ოპოზიციონერი დეპუტატი, გია ცაგარეიშვილი აცხადებს, რომ ეს საკითხი დღის წესრიგში ვერ დადგა, რადგან შესაწყალებელთა სია იუსტიციის მინისტრ ზურაბ ადეიშვილთან შეთანხმებით შედგა.
შეწყალების კომისიის მორიგი სხდომა 14 დეკემბრისთვის არის დაგეგმილი. კომისიის წევრები ამბობენ, რომ კიდევ ერთი შეწყალება საახალწლოდ იქნება. მაშინ, სავარუდოდ, სამოხელეო დანაშაულისა და ქრთამის აღების ფაქტზე ბრალდებულებს შეიწყალებენ.