მოსახლეობა ავტობაზრობის წინააღმდეგ

დავით აღმაშენებლის ქუჩიდან ე.წ. `ავტობაზრობის~ გადატანა იგეგმება. ყოველ შემთხვევაში, ბაზრობის ხელმძღვანელობას და ადგილობრივ მოსახლეობას ამის სურვილი აქვთ.

ნინო მგელაძე/ბათუმელები

ტერიტორია ჯამბულ მიქელაძემ ხუთი წლის წინ აუქციონის წესით შეიძინა და როგორც თავად ამბობს, აქ მანამდე არსებული საქმიანობა, უბრალოდ, დროებით გააგრძელა. იგი უკმაყოფილოა ბაზრობის შემოსავლებით და სხვა სახის ბიზნესის დაწყებას აპირებს. სამომავლოდ, ჯამბულ მიქელაძე ამ ტერიტორიაზე, კერძო ინვესტორის დახმარებთ, საცხოვრებელი სახლის აშენებას გეგმავს: `გასაყიდი ავტომობილების მეპატრონეების მხოლოდ 50% თუ იხდის ბაზრობის მოსაკრებელს. ეს კომუნალურ გადასახადებსაც კი ვერ ფარავს. გადასახადის თავის არიდების მიზნით ხალხი ავტომობილებს ბაზრობის გარეთ, სავალ გზაზე აჩერებს. ვფიქრობ, მათ ამის უფლება მერიამ არ უნდა მისცეს, ამას ზედამხედველობის სამსახური უნდა აწესრიგებდეს”.

მანქანებით მოვაჭრეები ბაზრობის გარეთ ავტომობილების თვითნებურად გაჩერების მიზეზად ტერიტორიაზე სიმჭიდროვეს და მაღალ გადასახადს ასახელებენ: ბაზრობაზე ერთი მანქანის გაჩერება ოთხი ლარი ღირს, ღამით დატოვება კი _ ერთი ლარი. გასაყიდად გამოყვანილი ავტომობილების მძღოლები, ბაზრობის გარეთ ადგილებს სწორედ ამ გადასახადის თავიდან ასაცილებლად იკავებენ.ბაზრობა ყოველ შაბათ-კვირას, გამთენიის ხუთი საათიდან იწყება და დღის თორმეტ საათამდე გრძელდება. ამ დროს ადამიანებს, ჩვეულებრივ, სძინავთ, აქაურებს კი ბაზრობის ხმაური დილის ექვსი საათიდან აღვიძებთ. უკმაყოფილო მოსახლეობა აღმაშენებლის ქუჩიდან ბაზრობის გადატანას ითხოვს. აქ მცხოვრებლები ამბობენ, რომ წესრიგს საპატრულო პოლიცია იცავს, თუმცა, ეს საკმარისი არ არის _ აქ ქაოსი და უწესრიგობაა.

აღმაშენებელზე მცხოვრები შოთა მიქელაძე ამბობს, რომ `ბაზრობის დღეებში აზრი არა აქვს სახლში გაჩერდები თუ გარეთ, აუტანელი ხმაურია~.ამ უბანში მცხოვრები ხათუნა მიქელაძე კი ერთ ინციდენტს იხსენებს: `წინა შაბათს ჩემი მეუღლე სამუშაოდან როცა დაბრუნდა საკუთარი მანქანით, ეზოში ვერ შემოვიდა, გასაყიდად გამოყვანილ ავტომობილებს ეზოს შემოსასვლელი გადაკეტილი ჰქონდათ. მძღოლს გზის დათმობა სთხოვა, მაგრამ ის გაბრაზდა და ჩემს ქმარს აქეთ დაუწყო ჩხუბი. ვფიქრობ, ასეთი ტიპის ბაზრობა დასახლებულ პუნქტში არ უნდა იყოს~.გარდა ამისა, გადაკეტილი გზისა და შეფერხებული მოძრაობის გამო დანიშნულების ადგილზე მისვლას, სულ ცოტა, ნახევარი საათით იგვიანებენ ის ადამიანები, ვინც ამ დღეს სამსახურში მიდიან.ის, რომ ბაზრობა მოსახლეობას აწუხებს, ჯამბულ მიქელაძემაც იცის: `სწორედ ამიტომ გადავწყვიტე, ეს ტერიტორია სხვა საქმისთვის გამოვიყენო. კერძოდ, საცხოვრებელი სახლის მშენებლობა მაქვს გეგმაში. თუკი მერია შემომთავაზებს ალტერნატიულ ფართს, სიამოვნებით შევცვლი ადგილს”. შეუცვლიან თუ არა ბაზრობას ადგილს, ჯერჯერობით, გაურკვეველია.

ბათუმის მერიის ქონების მართვის სამსახურის ქონების აღრიცხვისა და განკარგვის განყოფილების უფროსი, გოგა ლომაძე ამბობს: ”ადგილი, სადაც მანქანების ბაზრობა იმართება, კერძო საკუთრებაა და, შესაბამისად, მეპატრონის გადასაწყვეტია, რა ბიზნესს აწარმოებს საკუთარ ფართობზე. იმ შემთხვევაში, თუკი იქ მცხოვრებლებს არსებული სიტუაცია აწუხებთ, მაშინ მოგვმართონ განცხადებით, განვიხილავთ და შესაბამის გადაწყვეტილებას მივიღებთ”.